Spurs gitiwasan ang kalbaryo sa Warriors
CEBU, Philippines — Gitiwasan sa San Antonio Spurs ang kalbaryo sa Golden State Warriors human ilang gilubong ang two-time defending champion, 104-92 sa NBA kagahapon didto sa AT&T Center sa San Antonio, Texas.
Mao pa lamang kini ang ikatulong higayon nga nasagunsonan og tulo ka pilde ang Warriors sukad miasumir si Steve Kerr isip head coach niadtong 2014.
Nabokya ang Warriors sa tulo nila ka duwa didto sa Texas. Sa wala pa gipayaka sa Spurs, gibalhiboan na silang daan sa Houston Rockets ug Dallas Mavericks.
Sa kinatibuk-an, ang Warriors naparot sa ikalimang higayon sa katapusan nilang pito ka duwa hinungdan nga nanaog sila sa ikaduhang dapit sa Western Conference bitbit ang 12-6 record.
Si LaMarcus Aldridge mibahog og 24 puntos ug milangkat og 18 ka rebounds alang sa Spurs nga mipakgang sa tulo nila ka sunod-sunod nga pilde. Dako sab og naambag sila si DeMar DeRozan ug Rudy Gay nga nagkumbinar og 39 puntos.
Si Kevin Durant nga mihipos og 26 puntos mipasud lamang og walo sa 25 niya ka itsa. Si Klay Thompson midugang og 25 puntos alang sa Warriors nga wala gihapon ang alas nilang si Stephen Curry nga hangtod karon napaalim pa sa iyang injury. (BANAT NEWS)
- Latest
