CEBU, Philippines — Giandam na nila ni Gilas Pilipinas shooters Marcio Lassiter ug Matthew Wright ang ilang kaugalingon nga mopauwan og mga tres sa ila unyang duwa batok sa Kazakhstan ug Iran sa 2019 FIBA World Cup qualifiers didto sa Mall of Asia Arena.
Sila si Lassiter ug Wright nga duha sa mga premyadong tirador sa Gilas miingon nga kursonada nilang ipakita nga ang Gilas usa sa mga hait og shooting sa tanang Asian teams.
Sa statistics sa FIBA, ang Gilas nahimutang sa ika-14 sud sa 16 ka Asian teams kun outside shooting ang hisgutan.
Si Lassiter nagkanayon nga nahitabo kini tungod sa kakuwang sa kahigayonan sa mga shooters nga malibre ug makakupot og bola, apan salig siya nga mausab na karon ubos sa giya ni coach Yeng Guiao.
Nakapataas usab sa kompiyansa ni Lassiter ang pagduwa sa mga sinaligang sentro lakip na iyang teammate sa San Miguel Beermen nga si JuneMar Fajardo tungod kay dili na masentro ang depensa sa kontra ang mga shooters.
"I think it's just a matter of time. Everyone knows it's a new system, we can't argue about that and it's gonna take some time for everyone to acclimate," matud pa ni Lassiter.
Sila si Wright ug Lassiter ang gitan-aw ni Guiao nga kuhaong shooters alang sa Final 12 sa Gilas nga nganlan sunod semana.