CEBU, Philippines — Ang kanhi coach sa Gilas nga si Rajko Toroman miingon nga lig-on kaayo ang line-up sa Pilipinas ug maglisud ang Iran pagpilde niini.
Si Toroman midason sa pangangkon ni coach Yeng Guiao nga ang Gilas karon maoy labing ngilngig nilang line-up nga naporma sa kasaysayan sa national team.
Ang Gilas nga mopadayon sa ilang kampanya sa 2019 FIBA World Cup qualifiers karong Nobiyembre 30 batok Kazakhstan, mipagawas na sa lista sa ilang mga players nga gibidahan sa mga higante nga sila si Greg Slaughter, JuneMar Fajardo, Japeth Aguilar ug Christian Standhardinger.
Dugang pa sa veteran coach, nga sa maong line-up wala na manginahanglan ang Gilas sa serbisyo ni Andray Blatche, kinsa iya usab gihulagway nga nagkahinay. Nakauyon siya sa desisyon ni Guiao nga si Standhardinger ang himuon nga naturalized bigman tungod kay mas abtik kini.
Ang national team laraw nga mobawos sa Iran nga mipilde kanila sa miaging buwan. Magkuros og balik ang dalan sa magkaribal karong sa Disyembre 3 didto sa MOA Arena. (BANAT NEWS)