CEBU, Philippines — Kun si coach Yeng Guiao lang ang pabut-on, mahimo ra nga dili iapil si naturalized Andray Blatche sa line-up sa Gilas Pilipinas nga moduwa sa 2019 FIBA World Cup qualifiers.
Matud ni Guiao nga sa presensiya nila ni JuneMar Fajardo ug Greg Slaughter, dili na sila mabitin sa gitas-on nga gihimong rason aron kuhaon si Blatche. Ganahan pa si Guiao nga moduwa uban nila si Fil-German Christian Standhardinger nga nakita niya nga mao na lang ang hatagan sa luna sa naturalized player.
Si Blatche mahimo na unta nga makaduwa og balik sa national team human kini miserbisyo sa tulo ka duwa niya nga suspensiyon tungod sa iyang kalambigitan sa rambol tali sa Gilas ug Australia niadtong Hulyo.
Karong Nobiyembre 30, ang Gilas manalipod sa ilang balwarte dihang sulngon sila sa Kazakhstan ug sa Disyembre 3 batok sa Iran didto sa Mall of Asia Arena.