CEBU, Philippines — Sila si Agustin Ychon ug Ruffa Sorongon maoy midominar sa tagsa-tagsa nila ka dibisyon sa Gaisano Capital Anniversary Run sa miaging buntag didto sa Plaza Independencia, Dakbayan sa Sugbo.
Si Ychong maoy labing paspas modagan sa 21K men's open ug iyang gitapos ang lumba sud sa usa ka oras, 22 minutos ug 26 segundos. Nagsunod kaniya si Joseph Emia (1:24:13) ug si Desiderio Engbino (1:32:50) alang sa ikaduha ug ikatulo nga dapit.
Sa iyang bahin, ang bag-o lang gikoronahan nga Milo Marathon Cebu leg queen nga si Sorongon maoy nag-una sa women's class sa oras nga 1:38:55. Mipahiluna sa ikaduha ang batan-ong si Lovely Andrin (1:39:52), gisundan ni Evamie Villarin (1:46:44) nga maoy ikatulo.
Sa 12K category, sila si Benjamine Kidkazie ug Jelma Monsanto midominar sa tagsa-tagsa nila ka dibisyon.
Si Kidkazie mioras og 41:49 alang sa men's title, gisundan nila ni Arnell Saballa (42.16) ug Azlan Pagay (43.01).
Si Monsanto ang midaog sa women's division sa oras nga 55:02, samtang miokupar sa ikaduha ug ikatulo nga dapit mao sila si Jean Andrin (1:00.17) ug Margarita Planca (1:05.17).
Naghari sa 6K open sila si Earl Peonila (20:10) ug Geniecel Saballa (25:3), samtang ang 3K winners mao sila si Ryel Algufe (9:26) ug Jennifer Sabillon (15:13). (BANAT NEWS)