CEBU, Philippines — Ang impresibong salida ni Chris Banchero sa katapusang duha ka duwa sa Alaska Aces maoy nagtuboy kaniya aron ilhon isip Cignal-PBA Press Corps Player of the Week sa 2018 Governors' Cup.
Ang 29-anyos nga si Banchero mi-average og 19 puntos, pito ka assists ug 5.5 rebounds aron pagngulohan ang Alaska ngadto sa sagunson nga daog batok sa Columbian Dyip, 104-94 ug Blackwater Elite, 116-109 nga nakapainat sa ilang rekord ngadto sa 7-2.
Si Banchero nga maoy No. 5 overall pick sa 2014 PBA Draft, hapit maka-tripledouble dihang miiskor siya og 10 puntos, 11 ka assists ug pito ka rebounds.
Niadtong Domingo, si Banchero nagmangtas og maayo diin mikamada siya og 28 puntos aron aswaton ang Alaska batok sa Blackwater. Gilupig sa Fil-Italian guard sila si Cliff Hodge ug Chris Newsome sa Meralco, ug sila si Chris Ross ug Christian Standhardinger sa San Miguel sa maong senemanang pasidungog. (BANAT NEWS)