CEBU, Philippines — Ang Denver Nuggets maoy mitunol sa two-time defending champion Golden State Warriors sa labing una niining pilde sa sayong bahin sa NBA season, 100-98 sa kulbahinam nilang duwa kagahapon didto sa Pepsi Center sa Denver, Colorado.
Naglabaw ang Nuggets og 11 puntos sa katapusang kuwarter, apan ang Warriors nga gipangulohan sa 30 puntos ni Stephen Curry, miresbak aron pagtabla niining sa iskor, 97-97 sa nahibilin nga 1:29 sa aksiyon.
Ang tulo ka sagunson nga sipyat sa free throw sa Nuggets sa katapusang 1:18 nakahatag unta sa Warriors og higayon nga kawaton ang daog, apan wala sila makapahimus niini.
Si Draymond Green duna unta'y tsansa nga tablahon og balik ang duwa, apan usa ra ka free throw ang iyang napasud sa nahibiling 10 segundos.
Sa katapusang higayon, ang Warriors makapuwersa unta og overtime, apan napakyas sila sa ilang tinguha human ang itsa ni Damian Jones natapalan ni Juancho Hernangomez.
Si Gary Harris mihipos og 28 puntos, samtang si Nikola Jokic midugang og 23 puntos, 11 ka rebounds ug unom ka assists alang sa Nuggets nga nagpabiling wa'y pilde sa tulo ka duwa.
Sa laing duwa, si Russell Westbrook misidlak dayon sa iyang pagbalik og duwa uban ang 32 puntos, 12 ka rebounds ug walo pa assists, apan nakawang ang iyang paningkamot gumikan kay ang Oklahoma City Thunder napilde man ngadto sa Sacramento Kings, 131-120.
Si Iman Shumpert maoy nangu sa Kings uban ang 26 puntos, samtang si De'Aaron Fox mibahog og 22 puntos ug 11 ka assists.
Samtang ang Cleveland Cavaliers wala pa gihapo'y daog sukad mibiya kanila si LeBron James human sila mabihag sa Atlanta Hawks, 113-111 ug ang Los Angeles Clippers nakaipsot batok sa Houston Rockets, 115-112. (BANAT NEWS)