CEBU, Philippines – Moabot sa lima ka milyon ka pisos ang madawat ni bisan kinsang atleta nga makahatag og gold medal sa Pilipinas sa Asian Games nga buksan karong Sabado didto sa Jakarta, Indonesia.
Si Philippine Olympic Committee (POC) president Ricky Vargas miingon nga mohatag sila og P2 million sa gold medalist ug laing P2 million gikan sa gipasar nga balaod nga expanded athlete incentive act. Ang nahibiling P1 million magagikan sa Siklab Atleta Sports Foundation.
Gawas sa P5 million sa maka-gold, ang kadagkoan sa Philippine sports mitug-an nga adunay madawat nga P2 million sa maka-silver ug P1.2 million sa makakuha og bronze.
Adunay kinatibuk-ang 272 ka Pinoy athletes nga mosalmot sa 35 ka sporting disciplines sa Asian Games.