Nietes, palicte makighimamat sa fans

Si three-division world champion Donnie Nietes ug ang kababayan niining si Ashton Palicte gikatakda nga makighimamat sa ilang fans didto sa Amerika karong Agosto 25 didto sa Los Angeles Filipino Cultural Center.

Ang maong “Meet & Greet” nga kalihukan gipasiugdahan nilang Jhay Otamias ug Ed de la Vega aron mahatagan og oportunidad ang mga Pinoy didto sa L.A. nga mahimamat sa personal. Sila si Nietes (41-1-4, 23KOs)  ug Palicte (24-2, 20KOs) mag-abot sa lain na sab nga All-Filipino world championship bout alang sa WBO super flyweight title nga kabahin sa HBO Superfly 3 card karong Septiyembre 8 didto sa The Forum sa L.A.  Mao kini ang ikaduhang All-Pinoy world title fight sud lamang sa duha ka bulan ug ikatulo sa kinatibuk-an sa kasaysayan sa boksing sa nasud.

Ancajas modepensa na sab

Si Jerwin Ancajas manalipod sa iyang trono isip IBF super flyweight champion batok sa Mehikanong si Alejandro Santiago Barrios karong Septiyembre 29 didto sa California. Mao kini ang ikaunom nga pagdepensa sa 26-anyos nga si Ancajas sa iyang titulo. Sa miagi niyang away niadtong Mayo didto sa Save Mart Arena sa Fresno, California, si Ancajas mipukan ni Jonas 'Zorro' Sultan sa labing unang world championship fight sud sa 93 ka tuig diin nag-unay ang duha ka Pinoy'ng boksidor.

Ang una nahitabo sa dihang si Pancho Villa nakadepensa sa iyang world flyweight title batok ni Clever Sencio niadtong 1925 didto sa Manila.