Ex-Gilas players andam mutabang

CEBU, Philippines — Pipila ka mga kanhi sakop sa national team ang mipadayag sa ilang kaandam nga musul-ob pagbalik sa uniporme sa Pilipinas aron tabangan ang Gilas Pilipinas sa nagsingabot niining duwa batok Iran sa pagpadayon sa 2019 FIBA World Cup qualifiers sa Septiyembre.

Kini mao sila si Greg Slaughter ug Jeff Chan sa Barangay Ginebra Kings, Raymond Almazan ug Beau Belga sa Rain or Shine Elasto Painters ug Christian Standhardinger ug Arwind Santos sa San Miguel Beermen.

Ang PBA board of governors gikatakda nga magtigom karong Huwebes diin apil sa ilang hisgutan mao ang paghatag nila og tabang sa Gilas pinaagi sa pagpahuwam og mga PBA players.

Nasayran nga upat nal ang gikan sa orihinal nga 14-man lineup sa national team ang mamahimong moduwa sa sunod duwa sa World Cup qualifiers human sa gipakanaog nga silot sa FIBA tungod sa nahitabong rambol sa Gilas ug Australia niadtong Hulyo 2 didto sa Philippine Arena.

Sila si JuneMar Fajardo, Gabe Norwood, Baser Amer ug Allein Maliksi maoy bugtong players nga wala gisuspenso, samtang ang mga moserbisyo og suspensyon mao sila si Andray Blatche, Japeth Aguilar, Calvin Abueva, Matthew Wright, Jayson Castro, Terrence Romeo, Roger Pogoy, Troy Rosario, Carl Bryan Cruz ug Jio Jalalon. (BANAT NEWS)