CEBU, Philippines – Gipasalig ni boxing legend ug Golden Boy Promotions president Oscar De La Hoya nga madayon gyud ang WBA welterweight championship showdown tali ni Lucas Matthysse sa Argentina ug Pinoy boxing icon Manny Pacquiao sa Hulyo 15 didto sa Malaysia.
Si De La Hoya mipagawas sa iyang pamahayag human nigawas ang taho gikan mismo ni Top Rank Inc. CEO Bob Arum nga delikadong madiskaril ang sangka tungod sa isyu sa kuwarta.
Nasayran nga si Arum dili na mao ang main promoter ni Pacquiao, kinsa migamit sa kaugalingon niyang MP Promotions aron makigsabot sa kampo ni De La Hoya nga mao usab ang promoter ni Matthysse.
Si De La Hoya kinsa gikasangka usab ni Pacquiao niadtong tuig 2008 sa wala pa kini moretiro, miingon nga imposible nga dili moaway si Matthysse nga nangandam alang sa dakong gubat.