CEBU, Philippines — Si Frederick Elombi mitagak og 32 puntos sa dihang ang M. Lhuillier Kwarta Padala-University of Cebu (UC) Webmasters milampaso sa Cebu Landmasters-University of San Carlos (USC) Warriors, 77-63, aron pahugtan ang ilang pagkupot sa solong liderato sa collegiate division bitbit ang 4-0 record sa 2018 Cebu Schools Athletic Foundation, Inc. (CESAFI) Partner's Cup sa Cebu Coliseum kagahapon.
Miamot si Daryl Menina og 10 puntos alang sa Webmasters, nga misugat sa ikatulong kuwarter pinaagi sa 8-0 run aron pag-angkon og siyete puntos labaw, 32-25, human maalkansi 24-25 sa halftime.
Nakasikit ang Warriors sa iskor nga 36-38 apan gibirahan sab dayon kini sa Webmasters, 14-3, aron pag-establisar og 52-39 nga bentaha sa nahibiling otso minutos sa duwa.
Katapusang mipaduol ang Warriors sa iskor nga 63-70 apan wala sa ilang kiliran ang oras gumikan kay usa ka minuto na lang ang nahibilin sa aksiyon. Ang Webmasters misilyo sa ilang daog pinaagi sa pagkutlo sa katapusang siyete puntos sa duwa.
Sila si Magic Marata ug Roosevelt Jelianggao nagkumboya og 22 puntos alang sa Warriors, nga nadakin-as ngadto sa 2-3.
Sa sayo pa, si Khadsin Tagalog mitali og 17 puntos, si Tomtom Octaviano miiskor og 12 samtang si Allan Ruiz dunay 11 puntos sa dihang gipatilaw sa Mandaue Hotel-USC Baby Warriors ang Hotel Fortuna-UC Junior Webmasters sa labing una niining pilde. (BANAT NEWS)