CEBU, Philippines – Ang University of the Visayas (UV) Green Lancers mosuway og inat sa sagunson nilang daog ngadto sa tulo ka duwa sa dihang ilang sangkaon ang Southwestern University (SWU)-Phinma Cobras sa 2018 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.
Human gilampurnas ang Active Casino/University of San Jose-Recoletos (USJ-R) Jaguars ug Cebu Landmasters-University of San Carlos (USC) Warriors, ang Lancers nagtinguha karon nga makigsawo sa liderato sa collegiate division uban sa 3-0 nga M. Lhuillier Kwarta Padala-University of Cebu (UC) Webmasters.
Makigharong ang Lancers sa Cobras sa main game sa alas-4 sa hapon.
Angayan hinuon nga magmatngon ang Lancers gumikan kay ang Cobras lab-as pang mitukob sa Warriors, 80-73 aron santaon ang duha ka sunod-sunod niining pilde sa mga kamot sa UC ug Organique California-University of Southern Philippines Foundation (USPF) Panthers.
Sama sa ilang mga maguwang, ang Baby Lancers naglaraw sab nga mokulit sa ikatulo nilang sunod-sunod nga daog sa ilang paghagwa sa Cebu Eastern College (CEC) Dragons sa alas 2:30 sa hapon.
Human gipakuratan sa USPF sa una nilang duwa, ang Baby Lancers mipakaging sa USC ug USJ-R.
Dili sab angay nga mokompiyansa ang Baby Lancers sa Dragons nga mibihag sa Baby Warriors, 71-68 alang sa labing una nilang daog duha pa ka gabii ang milabay.
Sa laing sangka sa juniors division, ang Baby Jaguars ug Cebu Institute of Technology-University (CIT-U) Wildkittens pulos nagtinguha nga putlon ang duha ka sunod-sunod nilang pilde sa ilang panag-abot sa ala-1 sa hapon.