CEBU, Philippines – Dili makatuo si NLEX Road Warriors coach Yeng Guiao nga masagunsonan sila og duha ka pilde sa PBA Commissioner’s Cup.
Si Guiao wala mahimuot human napilde sila sa unang duha nila ka duwa human sa nindot nilang gipakita sa All-Filipino Cup diin sila nakasud sa semifinals sa labing unang higayon.
Ang multi-titled coach miangkon nga gutom na sila og daog ug kinahanglan na nilang modaog sa dihang ilang sangkaon ang Meralco Bolts karong alas-7 sa gabii didto sa Smart Araneta Coliseum.
Sa dili pa ang ilang duwa, magsangka una ang Columbian Dyip ug Alaska Aces sa alas-4:30 sa hapon.
Ang star player sa NLEX ug rookie nga si Kiefer Ravena positibo nga makabangon ang iyang koponan nga nahisukamod duha na ka higayon.
Ang kanhi Philadelphia 76ers cager nga si Arnett Moultrie magpas-an karon og bug-at nga responsibilidad nga mohatag og daog sa NLEX sa iyang PBA debut isip import.
Hinuon, harungon ni Moultrie ug NLEX ang Meralco nga bidahan ni kanhi best import ug ex-NBA standout Arinze Onuaku.