CEBU, Philippines — Si IBF super flwyeight champion Jerwin Ancajas modepensa sa iyang titulo karong Abril 14 batok sa kababayan niyang si Jonas Sultan nga maoy labing unang higayon nga ang duha ka Pinoy mag-unay alang sa usa ka world title sud sa dul-an sa usa ka siglo.
Si Ancajas ug ang iyang mandatory challenger nga si Sultan adto makigbinukbukay sa Mandalay Bay Resort and Casino sa Las Vegas.
“Yes po, tuloy na tuloy na po,” matud pa ni Joven Jimenez, ang trainer ug manedyer ni Ancajas sa Philstar.com.
Hinuon, si ALA Promotions President ug CEO Michael Aldeguer, ang promoter ni Sultan, mipadayag nga wala pa sila’y kontrata nga napirmahan.
“We are still discussing the details. No contracts have been signed yet. Hope to finalize it,” matud pa ni Aldeguer sa dihang nahinabi sa Banat News.
Kun ugaling maselyado na ang tanan, mao kini ang labing unang higayon sud sa kapin 90 ka tuig nga mag-abot ang duha ka Pinoy sa usa ka world championship fight.
Katapusan kining nahitabo niadto pang Mayo 2, 1925 sa dihang si Francisco Guilledo nga mas nailhan nga ‘Pancho Villa’, nanalipod sa iyang korona batok ni Clever Sencio didto sa kaulohan.
Ang 26-anyos nga si Ancajas (29-1-1, 20KOs) bag-o lang nakadepensa sa iyang trono human gipakamang ang Mehikanong si Israel Vasquez sa labing una niyang away sa Amerika sa miaging bulan.
Si international matchmaker Sean Gibbons nga maoy representante ni Ancajas, gikataho nga padung na sa Manila aron pormal nga ianunsiyo ang away.
Sa iyang bahin, si Sultan (14-3, 9KOs) nakaangkon og katungod nga mohagit ni Ancajas human gipilde si kanhi two-division world champion John Riel Casimero niadtong Septiyembre sa miaging tuig diha sa Waterfront-Cebu City Hotel and Casino. (BANAT NEWS)