CEBU, Philippines — Sila si Jameel Warney ug Reggie Hearn mipupo’g 17 puntos matag usa sa dihang gisugdan sa Team USA ang ilang kampanya sa 2019 Basketball World Cup qualifying tournament pinaagi sa pagkulit og 85-78 nga kadaogan batok sa Puerto Rico kagahapon didto sa Orlando, Florida.
Si Xavier Munford miamot og 12 puntos ug si Markel Brown dunay 10 puntos alang sa mga US team nga naalkansi og sayes puntos sa nanghinapos nga bahin sa third quarter sa iskor nga 51-57.
Apan ang Team USA mitubag pinaagi sa 10-0 run aron pag-ilog sa labaw, 61-57.
Human si Hearn milansang og tres aron buk-on ang panagtabla sa nahibiling 8:15 sa duwa, ang US miarangkada og maayo aron pag-inat sa ilang labaw ngadto na sa 10 puntos, 83-73 dayon na pagkulit og daog.
Sila si Angel Vassallo ug Angel Rodriguez nagkumboya’g 23 puntos alang sa Puerto Rico nga wala na makatilaw pa og daog batok sa Team USA sukad pa niadtong tuig 2005. (BANAT NEWS)