CEBU, Philippines — Laing key player na usab ang dili makaduwa sa Cleveland Cavaliers human makahiagum og seryosong injury sa tuhod ang veteran shooter nga si Iman Shumpert.
Si Shumpert naangol atol sa ilang duwa batok sa Los Angeles Clippers niadtong Sabado. Napangka ang tuhod ni Shumpert atol sa usa ka play ug wala na kini mubalik pa og duwa sugod sa third period.
Si Shumpert kinsa nag-average og 5.4 points ug 3.3 rebounds gikan sa bench, maoy ikatulong player sa Cavs nga adunay injury uban ni kanhi MVP Derrick Rose ug All-Star Isaiah Thomas.
Ang Cavaliers aduna karon upat ka sunod-sunod nga daog nga mibutang kanila sa ikapitong dapit sa standing sa Eastern Conference sa ilang 9-7 nga baraha. Suwayan nila nga ipadayun ilang winning streak karon batok sa Detroit Pistons. (BANAT NEWS)