CEBU, Philippines — Ang Cebuano star center nga si Greg Slaughter sa Barangay Ginebra Kings maoy gibayaw nga 'Best Player of the Conference' sa PBA Governors' Cup kagabii didto sa Smart Araneta Coliseum.
Tam-is ang maong kalampusan sa 6-foot-11 nga si Slaughter kinsa daku og natampo sa pagbalik sa finals sa Ginebra. Si Slaughter karon nga conference lang nakabwelo og duwa human magpaalim sa iyang injury.
Si Slaughter mitali og 975 points aron makuha ang award gisundan nila ni Meralco Bolts slasher Chris Newsome (707) ug June Mar Fajardo sa San Miguel Beer (617).
Sa iyang bahin, misakmit sa iyang back-to-back nga 'Best Import' award si Allen Durham sa Meralco human sa impresibo niyang performance karon nga conference.
Si Durham kinsa mi-average og double-double alang sa Bolts mihakot og 1,219 points alang sa maong award diin gisundan siya sa Barangay Ginebra import nga si Justin Brownlee nga adunay 834 points. — (BANAT NEWS)