CEBU, Philippines — Napanglantawan na ni PBA Commissioner Chito Narvasa ang usa ka init ug emosyonal nga finals rematch tali sa defending champion Barangay Ginebra Kings ug Meralco Bolts.
Ang Game-1 sa ilang “best-of-seven” Finals series sugdan karong Biyernes didto sa Quezon Convention Center.
“I’m glad to be part of this finale. You can feel the energy. I never felt this before,” matud pa ni Narvasa sa The Philippine STAR.
Ang duha ka coaches nga sila si Tim Cone sa Ginebra ug Norman Black sa Meralco nag-abot kagahapon sa usa ka press conference diin gipadayag ang grabe nila nga kagutom sa kampiyonato.
Bisan pa og sila ang defending champion, si Cone nagkanayon nga kinahanglan nila nga makahimo og ‘back-to-back’ aron ipakita nga dili tsamba ang ilang kampiyonato sa miaging tuig ilabi na karon nga usa ka lig-on ug himsog nga Meralco ilang ikasangka.
Naghinam-hinam usab si Cone tungod kay dili sama sa miaging Governors’ Cup finals, magamit niya karon ang iyang star center nga si Greg Slaughter.
Sa pikas bahin, ang Bolts walay laing sulod sa ilang huna-huna kun dili ang panimalos batok sa Ginebra.
Si Meralco star Jared Dillinger miingon nga personalay ang maong duwa tungod kay dako iyang pagdumot sa Ginebra.
Dili na usab magpapugong ang reigning Best Import nga si Allen Durham, kinsa miingon nga buhaton niya ang tanan aron mahatagan og kampiyonato ang Meralco nga wala niya mabuhat sa miaging tuig. (BANAT NEWS)