CEBU, Philippines — Mihimo og impresiyon si Carmelo Anthony sa iyang unang duwa uban sa Oklahoma City Thunder.
Si Anthony mipupo og 19 puntos sulod sa 20 minutos, apan nakawang ang ilang paningkamot ni Paul George nga mikamada og 15 puntos human ang Thunder napilde ngadto sa Houston Rockets, 97-104 sa ilang NBA pre-season game kagahapon didto sa Tulsa, Oklahoma.
Wala hinuon makapakita og aksiyon si reigning MVP Russell Westbrook, ang alas sa Thunder.
Sa habig sa Rockets, ilang gipakita nga wala sila manginahanglan ni Anthony.
Kahinumduman, nga human nila nabira si Chris Paul, ang Rockets misuway unta og kuha ni Anthony, apan wala kini madayon human nadiskarel ang ilang negosasyon uban sa New York Knicks.
Si Paul mihipos og 11 puntos ug pito ka assists sa una niyang duwa sa Rockets nga gipangulohan ni 'Sixth Man of the Year' Eric Gordon uban sa iyang 21 puntos.
Si James Harden mitikdol og 16 puntos ug 10 ka assists alang sa Rockets, kansang 24 ka tres nakatabang og dako pagpakgang sa Thunder. (BANAT NEWS)