CEBU, Philippines - Mosikad na ang Cebu Executives and Professionals Chess Association (CEPCA) Non-Masters Tournament karong adlawa diha sa Knight Attack Chess Cafe sa Robinsons Galleria Cebu. Sugdan ang mga duwa sa ala-1 sa hapon.
Magsubay og 7-round Swiss system format, ang duha ka adlaw nga torneyo abli lamang ngadto sa mga chess players nga dunay NCFP (National Chess Federation of the Philippines) rating nga 2000 paubos.
Ang makampiyon mobulsa og P3,000, samtang ang mopahiluna sa ikaduha ngadto sa ikalimang dapit modawat og P2,000, P1,000, P700 ug P500. Ang malandig sa ikaunom hangtod sa ika-10 nga puwesto dunay pahalipay nga P300 matag usa.
Ang registration nagkantidad og P150 sa mga hamtong ug P100 sa women, kiddies ug Cepcans.
Ang CEPCA ubos sa liderato ni Engr. Jerry Maratas modawat pa og mga entrante usa ka oras sa dili pa ang kompetisyon.
Alang sa dugang mga detalye, kadtong mga interesado mahimong mokontak ni FIDE Arbiter Marvin Y. Ruelan sa 0926-7352951. (BANAT NEWS)