CEBU, Philippines - Nagkataas ang emosyon tali sa mga magduduwa sa San Miguel Beermen ug TNT KaTropa ug seguradong laing init nga engkuwentro ang mahitabo sa Game 3 sa ilang “best-of-seven” finals series sa PBA Commissioner’s Cup karong gabii didto sa Smart Araneta Coliseum.
Ang duwa sugdan sa alas-6:30 sa gabii.
Human makuha sa TNT ang sikit nga daog sa Game 1 sa iskor nga 104-102, ang San Miguel abtik kaayong mibawos sa Game 2 niadtong Biyernes pinaagi sa usa ka dominanteng kadaugan sa iskor nga 102-88.
Ning higayona, ang duha ka koponan nasayod na sa ilang pagabuhaton aron mailog ang krusyal nga labaw sa serye.
Bisan gilubong sa Beermen ang KaTropa niadtong Biyernes, nahimong tensiyonado ang duwa tungod kay pipila ka mga players ang nagkainitay ilabi na nga nagkapisikal ang duwa timaan sa buot gyud ang duha ka koponan nga modaog.
Si TNT coach Nash Racela nagkanayon nga kinahanglan nga magpabilin ang konsentrasyon sa iyang mga players ilabi na karon nga gusto nila nga makuha pagbalik ang bentaha sa serye. Buot usab ni Racela nga mosuporta sa opensa ang iyang mga lokal sa panahon nga depensahan og maayo ang ilang import nga si Joshua Smith nga nalimitahan lang ngadto sa 11 puntos. (BANAT NEWS)