CEBU, Philippines - Dili na motiwas si five-time All-Star forward Blake Griffin sa iyang kontrata uban sa Los Angeles Clippers aron mamahimong usa ka ‘unrestricted free agent’.
Samtang ang iyang katumpang nga bitoon nga si Chris Paul gipaabot nga mosunod ni Griffin sa NBA free agency sunod semana. Bisan pa man sa ilang mga lakang, duna pa gihapo’y dakung kahigayonan nga ang duha magpabilin sa Clippers.
Si Paul nga mo- average og 18.1 points ug 9.2 assists matag duwa, gipanglantawan nga panguyaban sa San Antonio Spurs, samtang si Griffin nga maoy No.1 overall pick sa Clippers niadtong 2009 draft, lagmit saytan sa Oklahoma City Thunder.
Sa miaging season, si Griffin mipatik og 21.6 points ug 8.1 rebounds, apan kanunay siyang hamukon og injury hinungdan nga nakapalta siya og 83 ka duwa sa miaging tulo ka tuig. Garantisado hinuon siya nga modawat og $21.4 million sa sunod nga NBA season.
Sa giatngan nga free agent market, sila si Griffin ug Paul makig-uban unya nilang Gordon Hayward sa Utah Jazz, Kyle Lowry sa Toronto Raptors ug Dion Waiters sa Miami Heat.
Ang mga superstars sa Golden State nga sila si Stephen Curry ug Kevin Durant mamahimo sab nga free agent, apan misaad na sila nga magpabilin sa Warriors, ingon man silang Pau Gasol sa Spurs ug Dwyane Wade sa Heat. (BANAT NEWS)