CEBU, Philippines - Ang May edition sa Little Wesley So Cup banatan na karong adlawa diha sa Knight Attack Chess Cafe sa Robinsons Galleria Cebu.
Sugdan ang aksiyon sa alas-12:30 sa hapon.
Ang binulan nga torneyo gipasiugdahan sa Cebu Executives and Professionals Chess Association (CEPCA) alang sa mga batan-ong magduduwa og chess nga nag-edad og 12 anyos paubos sa tinguha nga makasigpat og talento ug ingon man mabaid og maayo kadtong mga potensiyal.
Ang makampiyon modawat og P1,000, samtang ang mopahiluna gikan sa ikaduha hangtod sa ikalimang puwesto mobira og P700, P500, P300 ug P200.
Ang ikaunom hangtod sa ika-10 dunay konsolasyon nga P100 matag usa ug ingon man ang top performers sa Under-8 ug Under-10 age groups.
Ang registration nagkantidad og P50. Kadtong gusto mosalmot mahimong magpalista sa binyu usa ka oras sa dili pa magsugod ang kompetisyon. (BANAT NEWS)