Cavs 2-0 ang tuyo, Celtics mobawos
CEBU, Philippines - Naglaraw ang defending champion Cleveland Cavaliers nga molansang og 2-0 nga labaw, samtang ang Boston Celtics manglimbasog aron makabawos sa Game-2 sa ilang NBA Eastern Conference finals karong adlawa didto sa TD Garden sa Boston, Massachusetts.
Ubos sa pagpangu ni LeBron James ug sa makapakurat nga salida ni Kevin Love, dominante kaayo ang Cavs hinungdan nga yano niining gilampaso ang Celtics, 117-104 sa Game-1 sa ilang “best-of-seven” series.
Pito ka players sa Boston nga gitahasan ni coach Brad Stevens aron modepensa ni James. Apan wa’y bisan usa nilang Jae Crowder, Isaiah Thomas, Marcus Smart, Al Horford, Jaylen Brown, Gerald Green ug Kelly Olynyk ang nakapugong sa four-time NBA MVP.
Ang makalisang kay bisan og miratsada siya og 38 points, siyam ka rebounds ug pito ka assists, si James mipadayag nga dili pa kadto ang labing maayo niyang duwa ug mosamot pa siya og kamangtas sa Game-2.
Ang Cavaliers nagtinguha karon nga mokadlit sa ikaduha nilang sunod-sunod nga 10-0 start sa NBA playoffs. Ilang gisilhig ang Indiana Pacers ug Toronto Raptors sa nag-unang duha ka hugna.
Gawas nilang James ug Love, laing labad sa ulo sa Celtics mao sila si Kyrie Irving, Tristan Thompson, J.R. Smith ug Kyle Korver.
Sa habig sa Celtics, dakung milagro ang ilang gikinahanglan atubangan sa ilang fans. Kinahanglan nga modaog sila aning duwaa kay kun masugamak sila pag-usab, hayan nga daw sama na sab nga nalubong na sila gumikan kay ang sunod nga duha ka duwa sa serye adto man duwaon sa Cleveland.
Sangonan sa bug-at nga tahas sa Celtics mao sila si Thomas, Horford, Corder ug Olynyk. Andam hinuon si Thomas nga mopas-an niini.
“There’s nothing to figure out,” matud pa ni Thomas nga nalimitahan lamang ngadto sa 17 puntos sa Game-1. (BANAT NEWS)
- Latest
