CEBU, Philippines – Inilog nang daan ang defending champion Cleveland Cavaliers ug Golden State Warriors nakapahimus pa sila og saktong pahuway nga seguradong makahatag kanila og dugang pabor pagsugod sa ikaduhang hugna sa NBA playoffs nga magsugod karong adlawa.
Ang Cavs ug ang Warriors mao lamang ang mga teams nga misilhig sa ilang nga kontra ug sila gihapon maoy paborito batok sa ilang mga karibal sa sunod nga hugna.
Ubos sa pagpangu ni LeBron James, nga naglaraw makaabot sa NBA Finals sa ikapito nga sagunson nga tuig, ang Cavs makigtige sunod batok sa Toronto Raptors sa seguradong dumot nga rematch sa Eastern Conference finals sa miaging tuig.
Sa laing match-up sa East semis, ang Boston Celtics makighamag batok sa Washington Wizards.
Samtang didto sa Western Conference, ang Warriors maghuwat pa hangtud karong Miyerkules sa dili pa sangkaon ang modaog sa tinaktakay nga Game 7 tali sa Utah Jazz ug Los Angeles Clippers karong adlawa didto sa Staples Center.
Sa laing engkuwentro sa West Final 4, ang managkaribal gikan sa Texas nga San Antonio ug Houston Rockets maoy magbangga. Mao kini ang labing unang higayon nga mag-abot sila sa playoff sukad niadtong 1995 season. – EBV (BANAT NEWS)