CEBU, Philippines - Magbinantayon ang Star Hotshots sa ilang tuyo nga mokulit og 3-0 record batok sa dinaug-daog nga NLEX Road Warriors sa PBA Commissioner’s Cup karong alas-7 sa gabii didto sa Smart Araneta Coliseum.
Sa dili pa ilang sangka, magtigi una ang TNT KaTropa ug Blackwater Elite sa alas-4:15 sa hapon.
Ang Star nga lab-as pa sa ilang dominanteng kadaugan batok sa GlobalPort Batang Pier, 103-77 sa miaging semana. Bisan pa niini, dili gihapon sila angayan nga mokompiyansa sa Road Warriors nga uhaw na kaayo og daog.
Sa laing bahin, giatngan karon ang pagduwa ni kanhi NBA bench scorer Donte Greene nga mopakita na og aksiyon uban sa KaTropa.
Si Greene maoy ikatulong import nga moduwa sa KaTropa karon nga conference puli ni Lou Amundson. (BANAT NEWS)