CEBU, Philippines - Ubay-ubay nga mga organisasyon nga dunay maayong kawsa ang mamahimong benepisyaryo sa Cebu International School Friendship Cup-Kyle Weckman and James Jung Memorial Football Tournament nga gikatakda karong Marso 4-5 didto sa CIS field sa Barangay Pit-os, dakbayan sa Sugbo.
Gumikan kay ang matigum sa maong duha ka adlaw nga kalihukan idonar man sa Cancer Warriors Foundation-Cebu Chapter, Children of Asia Philippines, Gawad Kalinga, Guadix Kiddie Center, Lihuk Panaghiusa, Seed4Com ug Yellow Boat of Hope Foundation.
Ang mga partisipante magkumbati ubos sa mga kategoriya -- mixed under 7, 9 ug 11, boys 13, 15, 17 ug 19 ug Inter-BPO/company sa men’s.
Sa women’s group mao ang ladies open ug girls 19. Gawas sa under-7, ang tanang dibisyon magsubay og seven-a-side format.
Ang registration fee nagkantidad og P1,000 alang sa mga age groups ug P1,500 sa ladies open ug Inter-BPO/company.
Ang registration kutob lamang karong Marso 1. (BANAT NEWS)