CEBU, Philippines - Tensiyon tali sa kanhi teammates ug managhigala nga sila si Kevin Durant ug Russell Westbrook gilantaw nga maoy modugang og lamas sa giatngan nga 66th NBA All-Star Game karong Domingo (Lunes oras dinhi sa Pilipinas) didto sa New Orleans.
Nagsugod ang panagbangi sa duha ka bitoon human klarong nasagmuyo si Westbrook sa gihimong paglayas ni Durant gikan sa poder sa Oklahoma City Thunder aron motapon ngadto sa Golden State Warriors.
Gani sa miagi nilang duha ka panag-abot sul-ot ang managlahing uniporme, ang duha kanunay nga magbinayloay og hait nga pulong sud sa korte.
Mao nang seguradong tutokan sa mga fans kun unsay lihok ug mga aksiyon nilang Durant ug Westbrook karon nga magkauban sila og usab ubos sa West All-Stars.
Si Durant wala na makaestorya pa si Westbrook sud sa pito ka bulan sukad siya mipirma og kontrata sa Warriors. Apan alang ni Durant, duwa maoy iyang tuyo ug wala siya’y panahon nga makigsulti ni Westbrook.
“I didn’t come here for there to be any drama or have a heart to heart with anyone,” matud pa ni Durant segun sa taho sa ESPN.
“It’s not even something I’m thinking about. If it happens it does. If it doesn’t it’s no big deal. I’m coming here to enjoy the weekend.”
Sa iyang bahin, gisalikway sab ni Westbrook ang isyu kabahin nilang Durant.
Si Westbrook mao karon ang NBA scoring leader uban sa iyang average nga 31.1 points matag duwa nga iyang gipalamanan og 10.5 rebounds ug 10.1 assists, samtang si Durant maoy leading scorer sa Warriors uban sa iyang 25.8 points ug 8.3 rebounds matag duwa.
Ang desisyon kun magkadungan ba og duwa silang Durant ug Westbrook, anaa kini sa mga kamot ni West All-Stars coach Steve Kerr. (BANAT NEWS)