CEBU, Philippines - Ang Sugbuanong rookie nga si Roger Pogoy gitan-aw karon nga umaabot nga haligi sa TNT KaTropa gumikan sa padayon niyang pagsidlak sa nagpadayong “best-of-seven” semifinals series sa PBA Philippine Cup.
Ang sakop sa Gilas cadet nga si Pogoy usa sa mga yawi sa kalampusan sa TNT nga labaw na karon sa series, 2-1 batok San Miguel Beermen.
Atol sa krusyal nga Game-3 niadtong Domingo, ang 6-footer nga si Pogoy mirehistro og career-high 22 puntos aron pangulohan ang TNT.
Si Pogoy mi-average og double-digits alang sa KaTropa atol sa elimination round nga naghatag og dakung pagsalig ni coach Nash Racela ngadto kaniya.
Gawas sa opensa, si Pogoy mipamatuod usab nga usa siya ka all-around player dihang milangkat siya og pito ka rebounds, tulo ka assists ug duha ka steals sa Game 2. (BANAT NEWS)