CEBU, Philippines - Gisagpa og P20,000 nga multa sa PBA Commissioner’s office si San Miguel Beermen import Elijah Millsap tungod sa pagsiko ni Glenn Khobuntin sa NLEX Road Warriors atol sa ilang sangka sa quarterfinals niadtong miaging semana.
Sa maong duwa, si Millsap miaksiyon og drive paingon sa ring, apan nag-una ang siko niini nga maayong pagkaigo sa nawong sa rookie nga si Khobuntin.
Wala tawgi og flagrant foul si Millsap sa maong duwa, apan dihang gi-review sa mga officials ang video sa maong duwa, ilang nakit-an nga gituyo ni Millsap nga pasakitan si Kobhuntin, kinsa nakaangkon og gisi sa aping.
Gawas ni Millsap, gipamulta usab ang duha ka players sa NLEX nga sila si Sean Anthony ug Henry Walker. Si Anthony gipabayad og P10,500 tungod sa flagrant foul, samtang si Henry Walker pabayron og P4,000 tungod sa technical foul. (BANAT NEWS)