CEBU, Philippines - Mipakita na sab og hiniusang puwersa ang tanang 21 ka barangay nga dunay representante sa Mayor Teresa P. Alegado Sportsfest 2016 nga mosikad pinaagi sa pinakasentro niining basketball event karong adlawa diha sa Consolacion Sports Complex.
Si league commissioner Paul Alelu Q. Flores, nga kanhi bitoon sa FEU Tamaraws sa dihang nagduwa pa siya sa UAAP uban ni PBA superstar Arwind Santos, nagkanayon nga sa kinatibuk-an, 42 ka teams ang mopakita’g aksiyon sa usa ka bulan nga torneyo.
Mga kategoriya nga kumbatihan mao ang seniors ug juniors-SK (Sangguniang Kabataan). Matag kategoriya bahinon sa duha ka grupo diin ang group A dunay duha ka brackets.
Ang ground rules sa miaging tuig mao gihapon ang ipatuman sa torneyo. Modepensa sa ilang titulo mao ang barangays Pulpogan sa inter-barangay A, Polog sa inter-barangay B, Casili sa SK-A ug Garing sa SK-B.
Moduwa sila ubos sa double round elimination format. Ang top 2 teams matag bracket human sa eliminasyon moabante sa crossover semifinals, diin ang topseeds magabaton og twice-to-beat advantage. Ang mga mananaog magsangka dayon sa kampiyonato sa usa ka best-of-three series.
Upat ka binyu ang gamiton nga mao ang barangay gyms sa Pulpogan, Poblacion Occidental, Garing ug Tayud. Ang mga duwa ubos sa superbisyon ni Flores inabagan ni technical committee head Leking Caylan ug assistant Aurelio Eslawan.
Gawas sa basketball, duna pa’y ubang matang sa paugnat sa kusog nga kumbatihan. Uban sa ilang mga tagduma, banatan sab ang volleyball (Russiel Balaba), badminton (Mae Ausifas Mangubat), chess (Melquiades Caylan), boxing (Peter Cabillada), scrabble (Kristyle Baroso) ug table tennis (Rafael San Juan).
Ang overall committee chairman sa maong usa ka bulan nga kalihukan mao si Liga ng mga Barangay President Roy Linaboc. Magsilbe niyang co-chairman mao sila si SB members Marilou P. Casul ug Benjamin ‘Boy’ Tibon.
Ipahigayon aron pagdugang og lamas sa tinuig nga selebrasyon sa pista sa Consolacion agi’g pagyukbo sa mahal nilang patron nga si San Narciso karong Oktubre 29, ang maong kalihukan hugtanong gipaluyohan sa Consolacion LGU ubos sa pagpangu ni Mayor Teresa Alegado ug Vice Mayor Dr. Rey Damole uban nilang SB members JoyJoy Alegado, Nelia Ermac, Elenito Palang, Brando Cuizon, Victor Maglasang ug Alfie Ouano. (BANAT NEWS)