CEBU, Philippines - Atubangon na sa Pinoy’ng boksidor nga si Marlon ‘Nightmare’ Tapales (28-2, 11KOs) sa RWS Stable ang labing daku nga away sa iyang kinabuhi sa dihang iyang hagiton si defending Thai champion Pungluang Sor Singyu (52-3, 35KOs) alang sa WBO bantamweight title karong hapon didto sa Ayutthaya City, Thailand.
Bug-at gyud nga tahas ang pas-anon ni Tapales gumikan kay gawas nga iyang sangkaon ang kampiyon nga mipilde sa tanan niyang 20 ka Pinoy nga kontra, moaway sab siya sa teritoryo sa iyang kaatbang diin notado kaayo ang ‘hometown decision’.
Apan si Tapales determinado nga makahaw-as siya nga malampuson sa labing lisud nga hagit sa iyang karera.
“It always motivates me to do some unique - something that’s done for the first time,” matud pa ni Tapales sa dihang nahinabi ni Dong Secuya sa Philboxing.com. “The greater the challenge, the more motivated I am.”
Si Tapales nakaangkon og katungod nga hagiton si Sor Singyu human iyang gipakamang ang kanhi wa’y pildeng Hapon nga si Shohei Omori sa ikaduhang hugna atol sa ilang WBO elimination bout niadtong Pebrero 16 didto sa Shimazu Arena sa Kyoto, Japan.
Si Tapales naglantaw ni Sor Singyu nga usa ka lig-on nga kontra, apan masaligon siya sa iyang tsansa gumikan na sab sa wa’y puas nilang training nga milanat og dul-an sa 12 semana.
“Studying the tapes of his previous fights, I can say that Sor Singyu is a dangerous opponent that is why I trained and prepared hard for him,” dason pa ni Tapales.
“I just have to give my best shot and take control from the first until the last round,” dugang pa sa garbo sa Lala, Lanao del Norte. “But if opportunity presents itself, I would definitely go for a knockout. That's really what I would be looking for knowing that I'm fighting in my foe's hometown.”
Kun ugaling magmadaugon, si Tapales mao unya ang ikaupat nga Pinoy world champion sunod nilang Donnie ‘Ahas’ Nietes (WBO light flyweight), Nonito ‘The Filipino Flash’ Donaire Jr. (WBO bantamweight) ug Johnreil ‘Quadro Alas’ Casimero (IBF flyweight).
Siya sab maoy ikaupat nga world champion gikan sa RWS Stable ni Cebuano topnotch promoter Rex ‘Wakee’ Salud sunod sa managsuong Dodie ug Gerry Peñalosa ug Malcolm ‘Eagle Eye’ Tuñacao.
Apan bisan unsa pa ang resulta, sanag nga ugma ang nagpaabot ni Tapales ilabi na kay ang ALA Boxing Gym interesado nga mokuha kaniya modaog man o mapilde batok ni Sor Singyu. (BANAT NEWS)