CEBU, Philippines - Sa talagsaon nga higayon, napuhalan ni Jubenile Abellar si Jon-Jon Adlawan aron pagdominar sa expert division sa 6th Mayor Martinez Motocross Cup dili pa lamang dugay didto sa lungsod sa San Remigio sa amihanang bahin sa Sugbo.
Si Jojie Basco maoy mipahiluna sa ikatulong dapit, samtang sila si Paulo Inoc ug Denden Supatan maoy nalandig sa nagsunod nga duha ka puwesto.
Sa iyang bahin, si BJ Pepito maoy nanghawod sa novice open human gipukan silang Jerjun Codera ug JP Cuesta.
Wala hinuon magmahay si Cuesta gumikan kay siya man maoy midaog sa power enduro batok nilang Clinton Gualiza ug Renren Hisoler.
Sama ni Cuesta, si Hisoler angay sab nga malipay gumikan kay siya maoy midominar sa local enduro.
Lain pang mga mananaog sa nagkadaiyang kategoriya mao sila si Patrick Cuesta (65cc), Paul Marapao, Ricardo Reluya ug Titing Sicad (executive A, B ug C), Rex Barbaso (veterans), Charice Lauron (50cc) ug Joey Labasano ug Zeb Cuyos (beginners). (BANAT PALARO)