CEBU, Philippines - Nakaipsot ang University of the Visayas (UV) Green Lancers sa kulbahinam nga duwa batok sa University of San Jose-Recoletos (USJ-R) Jaguars, 72-69 sa 1st Capt. Raul Cabanero Inter-collegiate Basketball League niadtong Miyerkules sa gabii didto sa Bulacao Sports Complex, dakbayan sa Talisay.
Ang UV nga misakmit sa ilang ikaduhang sunod-sunod nga daog gipangulohan ni Soliva, kinsa mitarok og 16 puntos. Giabayan sab og suwerte si Rey Suerte human siya miiskor og 14 puntos, samtang si Leonard Santillan mitikdol og 10 puntos alang sa UV Lancers nga adunay 2-0 record.
Lingaw ug nindot kaayo ang maong duwa gumikan kay kapila kini nagpuli-puli og labaw, apan nalupig sa lahutay ang USJ-R Jaguars ilabi na sa nahabiling mga minutos sa fourth period.
Si Kevin Villafranca maoy nangu sa 1-1 nga USJ-R Jaguars pinaagi sa iyang 19 puntos, gisundan ni Ralph Dinolan nga adunay 16 puntos.
Sa pasiunang duwa, ang San Vicente mipaluhod sa Upper Kabanayan, 75-61 ubos sa Inter-sitio division ning maong liga nga gipasiugdahan ni Brgy. Capt. ug Talisay City ABC president Raul Cabanero ug sa iyang mga kaabag nga konsehal nga si Banjo Abastillas, Darwin Cabanero ug Agnes Lastimosa.
Gisuportahan sab kini sa Bulacao Barangay Council ug sa SK Task Force.
Mipadagan sa maong liga mao ang Cebu Basketball Referee Association (CEBRA) sa pagpangulo ni CESAFI head referee Edwin Dejacto Sr. (BANAT PALARO)