CEBU, Philippines – Banatan na karong adlawa ang Peugeot Philippine Tennis Open, ang labing dakung tennis event sa Sugbo karong tuiga diha sa Cebu Country Club.
Dul-an sa 100 ka mga tennis players gikan sa nagkadaiyang dapit sa nasud ang magtigi alang sa korona nga gipangulohan ni multi-titled Cebuano Johnny Arcilla.
Si Arcilla lab-as pa sa iyang kadaugan sa Dagitab Festival Open sa miaging buwan didto sa Naga.
Ning higayona, si Arcilla nag-atubang og lisud nga hagit batok sa laing 63 ka mga magduduwa nga makigbangga kaniya alang sa men’s open crown.
Si Arcilla miisip ni Niño Alcantara nga mohatag kaniya og lisud nga duwa. Gawas ni Alcantara, moduwa usab sila si Roel Capangpangan, Calvin ug Claudio Canlas, Rey Antony Laplap ug Jose Maria Pague.
Uban ni Arcilla nga mobida alang sa mga Sugbuanon mao sila si Noynoy Seno ug RJ Abarquez.
Sa pikas bahin, ang mga contenders sa women’s class naglakip nila ni Hannah Espinosa, Jana Pages, Zethley Mae Alferez, Keisha Jabinez, Shyne Villareal, Elixabeth Abarquez, Ericka Manduriao ug Maria Dominique Ong.