CEBU, Philippines – Midaku pag-ayo ang chance ni San Miguel Beermen center JuneMar Fajardo nga masakmit ang iyang ikatulong ‘Best Player of the Conference’ award human siya naglabaw sa statistical points sa PBA Philippine Cup.
Human sa quarterfinals diin wala miduwa ang Beermen nga nakakuha og automatic semis berth, si Fajardo milabaw gihapon sa iyang 45.6 statistical points ug may kahigayonan siya nga padak-on pa kini depende sa iyang ipakita sa ilang semis series batok Rain or Shine Elasto Painters.
Sa gipagawas nga opisyal nga lista sa SPs sa PBA, nagsunod ni Fajardo mao si Greg Slaughter (43.2), apan wala na kini kahigayonan tungod kay natagak na ang Barangay Ginebra San Miguel.
Pabiling nakigkompetensiya ni Fajardo mao si GlobalPort Batang Pier guard Stanley Pringle, kinsa anaa sa ikatulo sa iyang 38.1 SPs, samtang sila si Sean Anthony (36.6) ug Asi Taulava sa NLEX Road Warriors maoy nagsunod sa ikaupat ug ikalimang dapit.
Sa laing bahin, ang No. 2 pick rookie sa Talk ‘N Text Tropang Texters nga si Troy Rosario milabaw sa iyang teammate ug No. 1 pick nga si Moala Tautuaa sa statistical points sa mga rookies. Si Rosario adunay 27.4 SPs, samtang si Tautuaa adunay 22.8 SPs. (BANAT NEWS)