CEBU, Philippines – Nagpadayon ang kabangis sa team Bulldog dihang ilang gilubong ang Dota, 97-86 alang sa ikatulong sunod-sunod nga daog sa 2nd edition sa Sunday.com Basketball Tournament niadtong Biyernes sa gabii didto sa Barangay Ibabao-Estancia gym, dakbayan sa Mandaue.
Ang Bulldog nga maoy midiktar sa tibuok duwa gipangulohan nilang Tawing Grafe ug Robert Curiba nga nagkumbinar og 29 puntos.
Si Armodia Pepito miposa’g pito ka 3-pointers sa kinatibuk-an niyang 27 puntos aron pangulohan ang Dota, apan nakawang lang kay napukan ang iyang koponan. Si Ilan Saludares miabuno’g 15 puntos, samtang si Edwin Jacobe mitimbre’g 10 puntos.
Ang Bulldog nagtangag na karon og 3-0 nga baraha, samtang ang Dota adunay 1-2 record ning maong torneyo nga gipaluyohan sa VECO, IPI ug Mayor Jonas Cortes.
Suwayan sa Bulldog nga mokubit sa ilang ikaupat nga daog sa pagkisangka nila batok sa Astroboy sa main game karong alas-7:40 sa buntag didto gihapon sa Ibabao-Estancia gym.
Sa pasiunang duwa, ang defending champion team Alitz mipilde sa Astroboy, 62-54 sa pagpangulo ni Dodoy Grafe pinaagi sa iyang 11 puntos.
Nangu sa Astroboy mao si James Latonio, kinsa mipabuto’g 22 puntos, gisundan ni Jojo Carba nga adunay 10 puntos.
Ang Alitz ug Astroboy parehong nagbitbit og 1-1 nga baraha ning maong liga nga gidumala ni Sunday.com presidente Tata Nadera inabagan sa tanang mga miyembro sa maong ballclub.
Puntos Matag Usa
Unang duwa:
ALITZ (62) – Grafe 11, Neri 9, Faelnar 8, Nadera 8, Ching 6, Armero 6, Sayson 6, Antigua 3, Del Castillo 2, Malahos 2.
ASTROBOY (54) – Latonio 22, Carba 10, Ancajas 5, Suico 4, Capinpin Jr. 4, K. Capinpin 4, Jamero 3, Barrentos 2.
Ikaduhang duwa:
BULLDOG (97) – Grafe 15, Curiba 14, Ygot 14, Yu 10, Apa Sr. 10, Mosqueda 8, Antigua 7, Casals 7, Bacus 6, Cabello 4, Nadera 2.
DOTA (86) – Pepito-27, Saludares 15, Jacobe 10, Manatad 8, Neiz 7, Almazan 6, Mascarenas 5, Paden 4, Antigua 4. (BANAT NEWS)