CEBU, Philippines – Mipatigbabaw si Aldritz Pondoyo sa 45 ka mga entrante aron sakmiton ang titulo sa R.P. Mora Kiddies Open Chess Tournament 2015 niadtong Domingo didto sa CMYK Dessert House and Sports Bar kilid sa Route Stop sa Barrio Luz, dakbayan sa Sugbo.
Si Pondoyo, gold medallist sa Palarong Pambansa sa miaging tuig didto sa Sta. Cruz, Laguna, mitapos sa maong 7-round Swiss system competition bitbit ang labing taas nga 6.0 puntos. Midawat siya og P3,000 nga premyo sa maong kadaugan.
Sila si Jerish Velarde ug Glysen Derotas parehong mitali og 5.5 puntos, apan si Velarde maoy mipatong sa ikaduhang puwesto gumikan sa mas taas niining tie-breaker. Mibulsa og P2,000 si Velarde, samtang si Derotas nakadawat og P1,000.
Naglangkob sa top 10 dala ang 5.0 puntos matag usa mao sila si Kirk Morala, Rejel Perandos, Andrew Balbona, Alphecca Gonzales, Jave Mareck Peteros, Jeremy Pepito ug Lawrence Paradela.
Mikumpleto sa Magic 13 nga nakadawat og P400 matag usa mao sila si Edel Vosotros ug Naureen Bagano nga adunay 4. 5 puntos ug si Adrian Basilgo nga nakapugnit og 4.0 puntos.
Mipadagan sa mga duwa mao si FIDE Arbiter Marvin Y. Ruelan. (BANAT NEWS)