CEBU, Philippines - Mga gagmitoy’ng players sa Gilas ‘D Boys maoy mihakop sa tanang puntos sa tibuok third quarter nga maoy nahimong taytayan sa ilang kadaugan batok sa Iesieken, 56-49 sa Triple-A Christmas League 2015 basketball tournament niadtong Domingo didto sa Kimwa gym sa Barangay Subangdaku, Mandaue City.
Sila si Lloyd Chavez ug Pedot Dakay maoy misalida sa third quarter, ilang gitambayayongan ang opensiba sa Gilas aron masakmit ang labaw, 41-39 gikan sa nuybe puntos nga biya sa halftime, 21-30. Si Chavez milabyog og 14 puntos, 12 niini iyang natala sa third period, samtang si Dakay mikulit og siyete sa kinatibuk-an niyang 11 puntos aron giyahan ang Gilas ngadto sa kadaugan. Sila si Ramil Estremos ug Rex Gonzaga nagkumbinar og 23 puntos.
Nakaigwales unta ang Iesieken, 43-all sa tira ni Orly Navarro sa sayong bahin sa fourth period, apan dali sab kining gitubag ni Jason Pestaño aron pagpaabante og balik sa Gilas, 47-45 ug nidaog gyud sila bisan pa sa mga kalisdanan.
Ang sentro nga si Mai Suson maoy nangu sa naparot nga Iesieken pinaagi sa iyang 12 puntos, gisundan nilang Navarro ug Dandy Tagalog nga mihirit og 10 puntos matag usa.
Ang Gilas ug Iesieken parehong nagbitbit og 2-2 nga baraha ning maong liga nga gipasiugdahan sa Allied Athletic Association kon Triple-A ubos sa ilang presidente nga si Gilbert Lesin.
Ang mga duwa gidumala nilang league commissioners Cris Martinito ug Jun Arceo ni Orly Navarro isip treasurer. Gialalayan sab ang pagpadagan sa duwa nilang Chang Tejero, Kenneth Ypanto, Arman Gonzaga ug Kenneth Tagalog.
Puntos Matag Usa
GILAS ‘D BOYS (56) – Chavez 14, Estremos 12, Dakay 11, Gonzaga 11, Baclay 4, Balagon 2, Pestaño 2.
IESIEKEN (49) – Suson 12, Navarro 10, Tagalo 10, Montalban 8, Arche 4, Almario 2, Majam 2, Abong 1. (BANAT NEWS)