CEBU, Philippines - Kapin sa 20 ka koponan gikan sa sulod ug gawas sa nasud ang magtigi sa 2015 Cebu 10’s Rugby football karon diha sa Cebu International School (CIS) sa Talamban, siyudad sa Sugbo.
Ang torneyo gibahin sa men’s open, under-16 ug kids categories.
Ang Cebu Dragons manalipod sa ilang balwarte batok sa mga bisitang kaatbang nga Alabang Eagles, Davao Durians, Iloilo Rugby, Clark Jets, CDO Rugby, Lapu-Lapu Jets, Albay Vulcans, Duma Dogs, Paradise Hunters ug Beijing Aardvarks nga gikan sa China.
Sa under 16, tulo ka mga koponan ang magtigi nga mao ang Cebu Junior Dragons, Davao Durians ug Bacolod Rugby.
Ang host team nga CIS, Sacred Heart School-Ateneo de Cebu, North and South District, Barangay Luz ug Mandaue City Central Special Education maoy magsangka sa kids class.