CEBU, Philippines – Ang duha ka Australian pro nga sila si Sam Betten ug Dimity Lee Duke maoy mipatigbabaw sa tagsa-tagsa nila ka mga kategoriya sa 2015 Safeguard 5i50 Triathlon kagahapon didto sa Bellevue Resort sa isla sa Panglao didto sa Bohol.
Si Betten maoy labing paspas sa maong makutas nga karera nga iyang gitapos sud lamang sa duha ka oras, usa ka minuto ug tulo ka segundos. Ang iyang kababayan nga si Michael Murphy maoy mipahiluna sa ikaduhang dapit sa oras nga 2:03:48, samtang si Justin Granger nalandig sa ikatulo sa oras nga 2:12:38.
Sa women's division, si Duke maoy gikoronahang hara sa oras nga 2:13:30. Nagsunod kaniya si Belinda Granger sa oras nga 2:19:47, samtang ang Pinay nga si Monica Torres maoy nikapyot sa ikatulong puwesto sa oras nga 2:26:26.
Ang garbo sa mga Bol-anon nga si Paul Jumamil wala sab magpabitin gumikan kay siya maoy nanghawod sa Filipino men's elite sa oras nga 2:07:26. Nagsunod kaniya si Jonard Saim sa oras nga 2:12:08, samtang ang Sugbuanon nga si Jory Ycong maoy na-3rd sa oras nga 2:12:13.
Si Jenny Guerrero maoy misakmit sa korona sa women's class human gibuntog niini ang Cebuana nga si Elona Louise Villacin. Si Guerrero mirehistro og oras nga 2:42:01, samtang si Vilacin mipatak og 2:54:34.
Lain pang mga Sugbuanon nga naka-podium finish kon naka-place sa tagsa-tagsa nila ka age group mao sila si Elmo Clarrabal (35-39), Jeff Codino ug June Marq Ocana (35-39), Giorgia Guidecelli (18-24), Welmar Saavedra (25-29), Maria Victoria Tan ug Noy Jopson (40-44). (BANAT NEWS)