CEBU, Philippines – Ang Cabangahan ug Cansaga mipakgang sa tagsa-tagsa nila ka mga kontra aron pagmartsa ngadto sa semifinals sa tagsa-tagsa nila ka mga kategoriya sa 5th Mayor Teresa P. Alegado Cup Fiesta Basketball League didto sa lungsod sa Consolacion.
Didto sa Jugan gym, ang Cabangahan nakaipsot human gilubong og 18 puntos sa ikatulong kuwarter dayon na ngadto sa pagpakurat sa Pitogo, 55-52, ug ingon man pag-angkon og luna sa semis sa SK Category A, samtang ang Cansaga nakalahutay ngadto sa Final Four sa Inter-Barangay Seniors Category A human gitagak ang Lamac, 63-62, sa makapaisa'g balhibo nilang engkuwentro.
Hinoon batoon pa nga dalan ang baktason sa Cabangahan ug Cansaga sa unahan gumikan kay ang ilang sangkaon sunod nga Tayud ug Jugan pulos man adunay twice-to-beat incentive.
Ang mopatigbabaw sa maong mga duwa mo-abante ngadto sa finals sa maong usa ka bulan nga torneyo nga hugtanong gipaluyohan ni Consolacion Mayor Teresa ‘Nene’ Alegado ug Vice Mayor Rey Damole. Ang maong sporting event gipangulohan nilang municipal councilors Nilo Ferraren ug Boy Tibon ug ABC President Marilou Casul.
Ang mga duwa ubos sa superbisyon ni commissioner Paul Alelu Q. Flores, kanhi star player sa Far Eastern University (FEU) Tamaraws sa dihang nagduwa pa siya sa UAAP, inabagan ni technical committee head Aurelio Eslawan.
Mga iskor
SK Category A
Cabangahan (55) – Maraño 22, Bacalso 12, Padayogdog 10, Colubio 6, Lopez 3, Miñoza 2
Pitogo (52) – Panta 16, Rosalejos 14, Demecillo 7, Arante 4, Felices 4, Pepito 3, Ontay 2, Otero 2,
Quarterscores: 5-11;22-2;27-45;55-52
Inter-Barangay Category B
Cansaga (63) – Casinillo 15, Padin 14, Recto 7, B. Ermac 5, C. Ermac 5, Tuñacao 5, Cabahug 4, C. Ermac 4, Rosello 4
Lamac (62) – Pales 22, Larrobis 8, Agan 8, Arranella 7, Armamento 6, Presbitero 4, Rayl 4, Maglasang 3
Quarterscores: 4-13;30-28;39-43;63-62. (BANAT NEWS)