CEBU, Philippines - Mihimo gilayon og impresiyon si Paolo Inoc sa iyang pagbalik og lumba gikan sa tulo ka tuig nga pahuway human iyang gilupig ang paborito nga si Jon-Jon Adlawan sa St. Therese Motocross Cup 2015 sa miaging adlaw didto sa Upper Casili, Consolacion.
Init kaayo ang giayag nga abilidad ni Inoc kay nag-una siya sa duha ka heat aron pagdominar niini sa labing lisud nga expert open division. Si Adlawan mitapos lamang sa ikaduhang dapit, samtang si Jubenile Abellar nalandig sa ikatulong puwesto.
Ang wa’y pagkahupas nga si Pepo Rubi misalida sab og maayo aron pagpilde sa mas batan-on niyang mga kaatbang dayon na ngadto sa pagsakmit sa titulo sa veterans category.
Sa iyang bahin, si Alfonso Famador maoy nanghawod sa mini 50 ug 65cc, samtang si Gyle Aguilar maoy mipatigbabaw sa mini 85cc.
Si Jun Enriquez maoy midaog sa executive B, samtang ang trono sa executive A adto napunta ni Ruscel Gungob.
Sa local enduro, si Alon Padica maoy mitapos sa unang puwesto, samtang si JP Cuesta nagmalampuson sa open enduro.
Nangharos sab sa tagsa-tagsa nila ka mga kategoriya mao sila si Jerry Sicad (beginners), Marielle Villafuerte (ladies open battle), Clinton Gualiza (beginners production) ug Don Supatan (novice production). (BANAT NEWS)