CEBU, Philippines - Unom ka mga Sugbuanon nga gipangulohan ni Rinna Babanto ang lakip sa nasudnong koponan nga moduwa sa Korean Open Taekwondo Championships ug World Hanmadang Festival sa Chuncheon City, Gangwon-do, South Korea.
Gawas sa multi-titled nga si Babanto, laing duha ka Cebuano junior nga pambato alang sa poomsae mao sila si Robygiele Lee ug Moises Bullicer.
Si Babanto moduwa sab sa freestyle team event sa World Hanmadang.
Ang Phl team adunay 10 ka seniors ug juniors nga moduwa sa poomsae.
Laing tulo ka Cebuano nga sila si Nica Garces, Mayn Coran ug Luiji Estrada mobanat sa kyurugi o sparring event.
Ang mga pambato sa nasud makigsangka sa ubang elite taekwondo jins gikan sa 50 ka nasud nga naglakip sa Vietnam, Chinese-Taipei, Iran, China, Japan ug host South Korea. (BANAT NEWS)