CEBU, Philippines - Ang tinamod nga amahan sa motocross dinhi sa Sugbo nga si Lou Ornopia, pormal nga milusad sa unang leg sa iyang 2015 MS Motosuit Motocross Series nga ulohan og 17th Ornopia Cup karong Abril 12 didto sa Calambua, lungsod sa San Remigio aminahang bahin sa Sugbo.
Sa maong higayon, wala kalikayi ni Ornopia nga hinumduman ang kagikan sa kompetisyon nga iyang gisugdan hapit na ma’g duha ka dekada ang milabay.
Matud ni Ornopia nga malipayon kaayo siya nga nagbunga ang iyang gihagoan. Kini kay gawas nga tighulma og mga kampiyon, usa sab ang iyang serye sa giatngan nga mga karera sa nagkadaiyang mga riders lukop nasud.
Gipasigarbo sab ni Ornopia nga sila lamang ang dunay regular nga motocross TV nga ipasundayag matag semana sa CCTN Channel 47.
Taliwala sa kalampusan nga iyang naangkon, nag-agi sab og mga pagsulay si Ornopia ug gani tungod niini napugos siya pag-undang sa pagpasiugda og kompetisyon niadtong tuig 2013.
Wala hinoon kini magdugay kay sa miaging tuig, mibalik sa eksena si Ornopia ug gani naglagiting nga kalampusan ang iyang natagamtaman sa kinatibuk-ang unom ka legs nga iyang napahigayon.
Nagkanayon si Ornopia nga maglisud gyud siya og biya sa motocross kay kabahin na man kini sa iyang kinabuhi. Utang niya sa motocross ang tanan nga iyang naabot.
Sa laing bahin, si Ornopia mibutyag nga pormal nilang pasidunggan ang mga mananaog sa ilang 2014 series sa dili pa matapos ang bulan diha sa Teatro Casino sa Waterfront Cebu City Hotel and Casino.