CEBU, Philippines - Duha ka boxing stars nga sila si Donnie ‘Ahas’ Nietes ug Nonito ‘Filipino Flash’ Donaire Jr. ang mohimo og public sparring karong alas-3 sa hapon diha sa ALA Fitness Gym sa Banilad Town Center (BTC).
Ang reigning WBO light flyweight champion nga si Nietes (34-1, 20KOs) modepensa sa iyang bakus batok ni Mexican power-hitter Gilberto ‘Parrita’ Parra (19-1, 17KOs) sa main event sa “Pinoy Pride 30: D-Day” karong Marso 28 didto sa Mall of Asia Arena sa Pasay City.
Sa iyang bahin, si Donaire (33-3, 21KOs) makigharong ni Brazilian William Prado (22-4, 15KOs) alang sa bakanteng North American Boxing Federation super bantamweight title.
Si Nietes mopakita sa iyang kusog ug kapaspas karon sa iyang pakig-sparring ni undefeated Virgil Vitor sud sa duha ka rounds, samtang si Donaire mosuway sa iyang abilidad batok ni Japanese Ryo Akaho.
Gawas ni Nietes ug Donaire, mohimo usab og sparring si IBF Intercontinental super bantamweight champion ‘Prince’ Albert Pagara batok sa stablemate nga si Melvin Gumban. Ang maong public sparring bukas ug libre sa publiko. Human sa sparring, sila si Nietes ug Donaire andam nga modawat og autograph signing ug photo sessions sa ilang mga fans.