CEBU, Philippines - Ang mga beterano ug bag-ong sulbong nga triathletes sa Sugbo magdangop na sab aron magpalabwanay sa ilang abilidad pinaagi sa final leg sa Team Triathlon Championships nga banatan karon didto sa lungsod sa Dalaguete.
Matud pa ni Benjoe Jimenez, usa sa mga event organizers, nga lain na sab nga kulbahinam nga aksiyon ang masaksihan sa mga manan-away sa men’s division, samtang sa women’s division, ang rayna sa triathlon sa Sugbo nga si Lorhiz Echavez-Lopez sa Team Omega Pro gipaabot nga manghawod.
Miabot ngadto sa 162 ka mga triathletes ang mosalmot sa torneyo, 30 niini mokumbati sa kiddies division nga naglangkob sa 8-under, 9-10, 11-12 ug 13-14 age groups.