CEBU, Philippines - Nahiagom sa labing ngil-ad nilang kapildihan karon nga season ang Cleveland Cavaliers human sila gilubong sa kaugalingon nilang balwarte sa Atlanta Hawks, 127-98 sa duwa nila sa NBA kagahapon didto sa Quicken Loans Arena sa Cleveland, Ohio.
Daling nakapangayo’g pasaylo ang head coach sa Cavs nga si David Blatt, kinsa midawat sa ilang kapildihan.
Si Shelvin Mack mihimo’g career-high 24 points alang sa Hawks. Si Mack mihulip sa posisyon sa ilang starting point guard nga si Jeff Teague, kinsa wala moduwa tungod sa injury.
Ang kanhi four-time MVP nga si LeBron James miiskor og 21 puntos, apan wala na siya misulod pa sa final period dihang gibiyaan na sila sa Hawks og 20 puntos sa iskor nga 95-75.
Si Al Horford midugang og 20 puntos alang sa Hawks, samtang si Mike Scott mitira og 15 puntos.
Ang gihilantan nga si Kevin Love nakahimo pag-iskor og 13 puntos ug milangkat og 11 ka rebounds alang sa naparot nga Cavs. (BANAT PALARO)