CEBU, Philippines - Giinat sa team PDBC ang ilang winning streak ngadto sa upat human nila gipilde ang Gold Muscle Gym ni Edmund Espina, 63-57 sa Power Dealer Basketball Club (PDBC) Christmas League 2014 niadtong Miyerkules diha sa Kimwa gym sa barangay Subangdaku, Mandaue City.
Si Calvin Comeros mikamada’g 13 puntos alang sa team PDBC nga maoy midiktar sa duwa gikan sa pagsugod hangtod na sa pagkahuman.
Ang big man ug playing coach nga si Arnold de Asis mitampo’g 12 puntos, samtang si Randy Povadora mihirit og 10 puntos alang sa team PDBC nga kasamtangang nag-una sa standing bitbit ang 4-0 nga baraha.
Dos puntos lang ang labaw sa team PDBC, 33-31 sa halftime, apan mitubo kini ngadto sa 10 puntos, 47-37 kortesiya sa three-pointer ni De Asis.
Miaksyon unta’g sikit ang Gold Muscle Gym sa paningkamot ni William Togono, apan napakyas kini pagsakmit sa momentum kay nahutdan sila sa oras.
Si Togono maoy nangu sa Gold Muscle Gym uban ni Romar Sauro nga parehong mialsa og 12 puntos.
Ang Gold Muscle Gym nagbitbit karon og 1-2 nga baraha ning maong torneyo nga gipaluyohan sa Saymer Merchandise nga gipanag-iya ni PDBC president Florentino Sayson.
Ang mga duwa gidumala ni PDBC founder Arnold de Asis ug Alner Mercado. (BANAT NEWS)
PUNTOS MATAG USA
PDBC (63) – Comeros 13, De Asis 12, Povadora 10, Sayson 9, Skye 7, Gomez 2, Alquilita 2, Maboles 2, Romares 2, Saballa 2.
GOLD MUSCLE GYM (57) – Togono 12, Sauro 12, G. Español 8, Alba 6, Margallo 4, Reyes 4, J. Español 2, Castro 2, Espina 2, Gabato 1.